मनोज जरांगे पाटलांचा प्रभाव की पदवीधरांची नाराजी? मराठवाड्यात शरद पवारांच्या राष्ट्रवादीचा विजय; शिंदेसेनेच्या राजकीय भूमिकेची चर्चा!

रामदास आठवले अभिजीत दिपकेंवर भडकले; म्हणाले दिपके यांच्या डोकयात हवा गेली आहे.

मुंबई : अभिजीत दिपके यांच्या नेतृत्वाखाली मुंबईतील शिवाजी पार्क येथे झालेल्या आंदोलनानंतर राजकीय वातावरण चांगलेच तापले आहे. दिपके यांच्या काही वक्तव्यांवर केंद्रीय सामाजिक न्याय राज्यमंत्री तथा रिपब्लिकन पक्षाचे नेते रामदास आठवले यांनी तीव्र आक्षेप घेतला आहे.

दिपके यांनी आंदोलनाच्या माध्यमातून केंद्र सरकार, निवडणूक प्रक्रियेतील कथित अनियमितता आणि सत्ताधाऱ्यांच्या भूमिकेवर प्रश्न उपस्थित केले होते. याच पार्श्वभूमीवर आठवले यांनी दिपके यांच्या भूमिकेवर नाराजी व्यक्त केली.

आठवले यांनी डॉ. बाबासाहेब आंबेडकर आणि संविधानासंदर्भातील वक्तव्यांवर विशेष आक्षेप घेतला. बाबासाहेब आंबेडकरांनी देशाला संविधानाच्या माध्यमातून लोकशाहीचा मार्ग दिला असून, त्यांच्याबाबत वक्तव्य करताना ऐतिहासिक तथ्यांचा विचार करणे आवश्यक असल्याचे आठवले यांनी म्हटल्याचे वृत्त आहे.

“दिपकेंच्या डोक्यात हवा गेली”

दिपके यांच्यावर टीका करताना रामदास आठवले यांनी “दिपकेंच्या डोक्यात हवा गेली आहे”, अशा शब्दांत प्रतिक्रिया दिल्याचे वृत्त आहे. दिपके यांनी चुकीची किंवा आक्षेपार्ह वक्तव्ये करू नयेत, असा इशाराही त्यांनी दिला.

दिपके यांच्या आंदोलनातील भूमिकेवरही आठवले यांनी प्रश्न उपस्थित केले. दिपके हे आंबेडकरवादी असल्याचा दावा करत असतील, तर बाबासाहेब आंबेडकरांच्या विचारांचा आणि संविधानाचा सन्मान राखणे आवश्यक असल्याचे आठवले यांनी स्पष्ट केले.

रिपब्लिकन पक्षाच्या भूमिकेचा इशारा

या वादाच्या पार्श्वभूमीवर रिपब्लिकन पक्षाची भूमिका आणखी आक्रमक होण्याची शक्यता व्यक्त केली जात आहे. दिपके यांनी अशी वक्तव्ये सुरूच ठेवली तर पक्षाकडून कठोर भूमिका घेतली जाऊ शकते, असा इशारा आठवले यांनी दिल्याचे वृत्त आहे.

दरम्यान, २ ऑक्टोबर रोजी शिवाजी पार्क येथे झालेल्या आंदोलनामुळेही दिपके चर्चेत आले होते. मुख्य निवडणूक आयुक्त ज्ञानेश कुमार यांच्या राजीनाम्याची मागणी या आंदोलनातून करण्यात आली. निवडणूक प्रक्रियेबाबत प्रश्न उपस्थित करत दिपके यांनी सरकार आणि निवडणूक व्यवस्थेवर टीका केली होती.

आता रामदास आठवले यांच्या आक्रमक प्रतिक्रियेमुळे दिपके विरुद्ध आठवले असा नवा राजकीय संघर्ष निर्माण होण्याची शक्यता निर्माण झाली आहे. या प्रकरणी अभिजीत दिपके यांच्याकडून पुढील प्रतिक्रिया काय येते, याकडे राजकीय वर्तुळाचे लक्ष लागले आहे.