मनोज जरांगे पाटलांचा प्रभाव की पदवीधरांची नाराजी? मराठवाड्यात शरद पवारांच्या राष्ट्रवादीचा विजय; शिंदेसेनेच्या राजकीय भूमिकेची चर्चा!

पतंजलीच्या तुपावर FDAचा मोठा दणका! २,२७९ लिटर तुपाचा साठा जप्त; राज्यभरात १६ जणांना अटक

२० लाखांहून अधिक किमतीचे तूप ताब्यात; ९ कोटींचे संशयित खाद्यपदार्थ जप्त, तुकाराम मुंढेंच्या नेतृत्वाखाली अन्नभेसळविरोधी मोहीम

मुंबई : ग्राहकांच्या आरोग्याशी खेळ करणाऱ्या अन्नभेसळखोरांविरोधात महाराष्ट्राच्या अन्न व औषध प्रशासनाने (FDA) धडक मोहीम सुरू केली असून, या मोहिमेत पतंजली कंपनीच्या गायीच्या तुपाचा मोठा साठा जप्त करण्यात आला आहे. छत्रपती संभाजीनगर येथील पतंजलीच्या सुपर वितरकाच्या गोदामावर छापा टाकून तब्बल २ हजार २७९.७ लिटर तूप ताब्यात घेण्यात आले. या साठ्याची किंमत २० लाख २० हजार १९० रुपये असल्याची माहिती समोर आली आहे.

छत्रपती संभाजीनगरमध्ये गोदामावर छापा

छत्रपती संभाजीनगरमधील सुंदरवाडी परिसरात असलेल्या मेसर्स दिव्य महावितरक या पतंजली आयुर्वेदच्या सुपर वितरकाच्या गोदामाची FDA अधिकाऱ्यांनी तपासणी केली. या तपासणीत गायीच्या तुपाचे ४ हजार ३२ पॅक आढळून आले. त्यामध्ये एकूण २ हजार २७९.७ लिटर तुपाचा साठा होता.

उत्पादनाच्या लेबलिंगमध्ये अनियमितता आणि भेसळीचा संशय आल्याने प्रशासनाने हा संपूर्ण साठा जप्त केला. मात्र, तुपामध्ये प्रत्यक्ष भेसळ झाल्याचा अंतिम निष्कर्ष प्रयोगशाळेच्या तपासणीनंतरच स्पष्ट होणार आहे.

राज्यभरात ९ कोटींचे खाद्यपदार्थ जप्त

FDAने राज्यातील सात प्रशासकीय विभागांमध्ये विशेष तपासणी मोहीम राबवली. या मोहिमेदरम्यान ११४ अन्न व्यवसायांची तपासणी करण्यात आली. त्यामध्ये तब्बल ३ लाख ५३ हजार किलो खाद्यपदार्थ जप्त करण्यात आले. या जप्त साठ्याची किंमत सुमारे ९ कोटी १ लाख रुपये असल्याचे सांगण्यात आले आहे.

तेल, तूप, तांदूळ, डाळी, गूळ, मसाले, मिठाई आणि दुग्धजन्य पदार्थांसह विविध खाद्यपदार्थांचा या कारवाईत समावेश आहे.

१६ जणांना अटक; सात आस्थापने सील

२८ ते ३१ ऑक्टोबरदरम्यान राबविण्यात आलेल्या कारवाईत राज्यभरात १३ गुन्हे दाखल करण्यात आले. एकूण १६ जणांना अटक करण्यात आली असून सात आस्थापने सील करण्यात आली आहेत. सहा वाहने जप्त करण्यात आली असून १९ अन्न व्यावसायिकांचे परवाने किंवा नोंदणी निलंबित करण्यात आली आहे.

सातारा-सोलापूरमध्येही कारवाई

पश्चिम महाराष्ट्रातही FDAने तपासणीचा फास आवळला आहे. सातारा जिल्ह्यातील अमीन ट्रेडर्स आणि स्वाती ऑईल मिल्ससह विविध ठिकाणी कारवाई करण्यात आली. सोलापूरमधील एस. जी. ट्रेडर्सच्या खाद्यतेलाच्या साठ्यावरही प्रशासनाने कारवाई केली.

तुकाराम मुंढेंच्या नेतृत्वाखाली कारवाईची मोहीम

अन्न व औषध प्रशासनाचे आयुक्त तुकाराम मुंढे यांच्या नेतृत्वाखाली ही विशेष मोहीम राबविण्यात आली. सणासुदीच्या काळात खाद्यपदार्थांची मागणी वाढत असताना भेसळखोरांवर नियंत्रण ठेवण्यासाठी प्रशासनाने तपासणी तीव्र केली आहे.

ग्राहकांच्या आरोग्याचा प्रश्न ऐरणीवर!

तूप, तेल, दूध आणि मसाले हे प्रत्येक कुटुंबाच्या दैनंदिन आहारातील महत्त्वाचे घटक आहेत. अशा पदार्थांच्या गुणवत्तेबाबत संशय निर्माण झाल्यास सामान्य ग्राहकांच्या मनात भीती निर्माण होणे स्वाभाविक आहे. त्यामुळे केवळ छापे टाकून न थांबता दोषींवर कायदेशीर कारवाई, प्रयोगशाळेचे अहवाल आणि नियमित तपासणी यांनाही महत्त्व देणे आवश्यक आहे.

जन प्रतिसाद एक्सप्रेसचा सवाल : ग्राहकांच्या ताटात जाणाऱ्या अन्नाची शुद्धता तपासण्याची जबाबदारी नेमकी कोणाची? भेसळखोरांवर कारवाईबरोबरच बाजारपेठेत विकल्या जाणाऱ्या प्रत्येक खाद्यपदार्थाच्या गुणवत्तेची खात्री प्रशासन कधी देणार?

विशेष नोंद : पतंजलीच्या तुपाचा साठा संशयाच्या आधारे जप्त करण्यात आला आहे. प्रयोगशाळेचा अंतिम अहवाल येण्यापूर्वी भेसळ सिद्ध झाल्याचे मानता येणार नाही. राज्यभरातील १६ अटकांचा आकडा हा विविध कारवायांचा एकत्रित आकडा आहे; तो पतंजलीच्या प्रकरणापुरता नाही.

जन प्रतिसाद एक्सप्रेस | जनतेचा आवाज, जनतेचा विश्वास!