सोनपापडीचा बॉक्स नाही, तर दिवाळी बोनस म्हणून कर्मचाऱ्यांच्या हातात ठेवले तब्बल १ लाख रुपये! सुरतच्या व्यापाऱ्याचा दिलदारपणा पाहून महिला कर्मचाऱ्यांना अश्रू अनावर!
https://www.facebook.com/share/r/1CMRZfpgyp/
सुरत : दिवाळी म्हटले की अनेक कंपन्यांकडून कर्मचाऱ्यांना सोनपापडीचे बॉक्स, मिठाई किंवा एखादी छोटीशी भेटवस्तू दिली जाते. मात्र, गुजरातमधील सुरत येथील एका कापड व्यावसायिकाने दिवाळीनिमित्त आपल्या कर्मचाऱ्यांना दिलेल्या अनोख्या भेटीने संपूर्ण देशाचे लक्ष वेधून घेतले आहे.
सुरतमधील मोता वराछा परिसरातील महादेव क्लॉथ सेंटरचे व्यावसायिक रामस्वरूप मुंडे यांनी आपल्या २० महिला कर्मचाऱ्यांना प्रत्येकी एक लाख रुपयांपेक्षा अधिक रकमेचा रोख दिवाळी बोनस दिला. या बोनससाठी त्यांनी तब्बल २० लाख रुपयांहून अधिक रक्कम खर्च केली.
नोटांच्या बंडलांनी सजवलेल्या थाळ्या!
या बोनसचे वैशिष्ट्य म्हणजे त्यांनी कर्मचाऱ्यांना साध्या लिफाफ्यात पैसे न देता चांदीसारख्या आकर्षक पूजेच्या थाळ्यांमध्ये १०, २०, ५०, १००, २०० आणि ५०० रुपयांच्या नोटांची बंडले सजवून दिली. व्यापारी आणि त्यांच्या पत्नीने कर्मचाऱ्यांना स्वतः या थाळ्या सुपूर्द केल्या.
आनंदाच्या भरात महिला कर्मचाऱ्यांना अश्रू अनावर!
आयुष्यात कधीही अपेक्षा केली नसेल अशी मोठी भेट अचानक हातात मिळाल्याने महिला कर्मचारी अक्षरशः भारावून गेल्या. काही महिलांना आनंदाश्रू अनावर झाले. त्यांनी मालकाला मिठी मारून आणि आभार व्यक्त करून आपल्या भावना व्यक्त केल्या. या भावनिक क्षणांचा व्हिडिओ सोशल मीडियावर मोठ्या प्रमाणात व्हायरल होत आहे.
कर्मचाऱ्यांना मानले कुटुंबातील सदस्य!
रामस्वरूप मुंडे यांनी आपल्या कर्मचाऱ्यांना केवळ कामगार न मानता कुटुंबातील सदस्य मानत असल्याचे सांगितले. त्यांच्या मते, कर्मचाऱ्यांच्या मेहनतीमुळेच व्यवसायाची प्रगती झाली आहे. त्यामुळे व्यवसायाच्या यशाचा आनंद कर्मचाऱ्यांनाही मिळाला पाहिजे, ही त्यामागची भावना आहे.
या भेटीमागे राजस्थानमधील 'मायरा' किंवा 'मामेरा' या पारंपरिक प्रथेची प्रेरणाही असल्याचे वृत्त आहे. या परंपरेत माहेरकडून महिलांना भेटवस्तू आणि आर्थिक मदत दिली जाते.
सोशल मीडियावर कौतुकाचा वर्षाव!
या घटनेचा व्हिडिओ व्हायरल झाल्यानंतर सोशल मीडियावर व्यापाऱ्याच्या या कृतीचे कौतुक होत आहे. कर्मचाऱ्यांच्या कष्टाची खरी किंमत ओळखणारा मालक असावा, अशा प्रतिक्रिया नेटकरी व्यक्त करत आहेत.
पैसा कमावणारे अनेक असतात; पण आपल्या यशात वाटा उचलणाऱ्या माणसांच्या चेहऱ्यावर आनंद फुलवणारे हात मात्र विरळाच! सुरतच्या या व्यापाऱ्याने दिवाळीच्या निमित्ताने माणुसकीचा आणि कर्मचारी सन्मानाचा सुंदर संदेश दिला आहे.
— जन प्रतिसाद एक्सप्रेस
Post a Comment