Top News

खिशाला पुन्हा कात्री! CNG दरात दीड रुपयांची वाढ; आता प्रतिकिलो ९१.५० रुपये मोजावे लागणार!


 खिशाला

 पुन्हा कात्री! CNG दरात

 दीड रुपयांची वाढ;

 आता प्रतिकिलो ९१.५०

 रुपये मोजावे लागणार!

मुंबई : महागाईने आधीच त्रस्त असलेल्या मुंबईकरांना आता आणखी एक आर्थिक झटका बसणार आहे. महानगर गॅस लिमिटेडने (MGL) मुंबई आणि आसपासच्या परिसरातील सीएनजीच्या दरात प्रति किलो १ रुपये ५० पैशांची वाढ जाहीर केली आहे. त्यामुळे सीएनजीचा दर आता ९१.५० रुपये प्रति किलो झाला आहे. हे नवीन दर १५ नोव्हेंबर २०२६ पासून लागू होणार आहेत.


१५ दिवसांत दुसऱ्यांदा दरवाढ!

विशेष म्हणजे, मुंबईत अवघ्या १५ दिवसांच्या कालावधीत सीएनजीच्या दरात दुसऱ्यांदा वाढ करण्यात आली आहे. यापूर्वी १ नोव्हेंबर रोजी सीएनजीच्या दरात एक रुपयाची वाढ करण्यात आली होती. आता पुन्हा दीड रुपयांची वाढ झाल्याने वाहनधारकांच्या खर्चात भर पडणार आहे.

दरवाढीमागचे कारण काय?

महानगर गॅस लिमिटेडच्या माहितीनुसार, मध्यपूर्वेतील सुरू असलेल्या संकटामुळे नैसर्गिक वायूच्या खरेदी खर्चात वाढ झाली आहे. त्याचबरोबर देशांतर्गत गॅसचा पुरवठा कमी झाल्याने महागड्या आयातित रिगॅसिफाइड लिक्विफाइड नॅचरल गॅसवर (RLNG) अवलंबित्व वाढले आहे. वाढलेल्या खर्चाची काही प्रमाणात भरपाई करण्यासाठी ही दरवाढ करण्यात आल्याचे कंपनीने स्पष्ट केले आहे.

रिक्षा, टॅक्सी चालकांना मोठा फटका

या दरवाढीचा परिणाम मुंबई महानगर प्रदेशातील रिक्षाचालक, टॅक्सीचालक, खासगी वाहनधारक आणि सार्वजनिक वाहतूक व्यवस्थेवर होण्याची शक्यता आहे. इंधनाचा खर्च वाढल्याने वाहनचालकांच्या दैनंदिन उत्पन्नावर परिणाम होऊ शकतो. भविष्यात प्रवासी भाडेवाढीची मागणीही जोर धरू शकते.

आधीच वाढत्या महागाईमुळे सामान्य नागरिकांचे आर्थिक गणित बिघडले असताना आता सीएनजी दरवाढीमुळे प्रवासाचा खर्च आणखी वाढण्याची शक्यता आहे.


जन प्रतिसाद एक्सप्रेस – मुंबईकरांच्या खिशावर वाढत्या महागाईचा आणखी एक भार!

Post a Comment

Previous Post Next Post