कोल्हापूर जिल्ह्यात १ हजार शेतकऱ्यांना ताडपत्रीचे वाटप; एस.बी. फाउंडेशनचा स्तुत्य सामाजिक उपक्रम!
‘मागेल त्याला ताडपत्री’ संकल्पातून एक लाख शेतकऱ्यांपर्यंत मदत पोहोचविण्याचे सागर भावके यांचे उद्दिष्ट; शेतकरी बांधवांमध्ये समाधानाचे वातावरण
कोल्हापूर | प्रतिनिधी
शेतकऱ्यांच्या अडचणी समजून घेत त्यांच्या मदतीसाठी प्रत्यक्ष मैदानात उतरून सामाजिक बांधिलकी जपण्याचे काम एस.बी. सामाजिक व शैक्षणिक युवा फाउंडेशन, महाराष्ट्र राज्य यांच्या वतीने करण्यात येत आहे. या फाउंडेशनच्या माध्यमातून आतापर्यंत कोल्हापूर जिल्ह्यातील तब्बल १ हजार शेतकऱ्यांना ताडपत्रीचे वाटप करण्यात आले आहे. शेतकऱ्यांना आर्थिक आणि नैसर्गिक संकटाच्या काळात आधार देण्याच्या उद्देशाने राबविण्यात येत असलेला हा उपक्रम जिल्ह्यात कौतुकाचा विषय ठरत आहे.
शेती हा ग्रामीण अर्थव्यवस्थेचा कणा असून शेतकऱ्यांना अनेकदा अवकाळी पाऊस, अतिवृष्टी, पिकांचे नुकसान तसेच आर्थिक अडचणींचा सामना करावा लागतो. विशेषतः कापणी आणि मळणीच्या हंगामात शेतमालाचे संरक्षण करणे अत्यंत महत्त्वाचे असते. अनेक शेतकऱ्यांना आर्थिक परिस्थितीमुळे आवश्यक साहित्य खरेदी करणे शक्य होत नाही. ही गरज लक्षात घेऊन फाउंडेशनचे सागर भावके यांनी ‘मागेल त्याला ताडपत्री’ हा सामाजिक संकल्प हाती घेतला आहे.
या संकल्पनेतून कोल्हापूर जिल्ह्यातील शेतकरी बांधवांपर्यंत ताडपत्री पोहोचविण्याचे काम सुरू असून आतापर्यंत एक हजार शेतकऱ्यांना याचा लाभ मिळाला आहे. केवळ ताडपत्री वाटपापुरते मर्यादित न राहता शासनाच्या विविध कल्याणकारी योजनांची माहिती आणि त्यांचे लाभ शेवटच्या घटकापर्यंत पोहोचविण्याचाही फाउंडेशनचा प्रयत्न आहे.
एक लाख शेतकऱ्यांपर्यंत पोहोचण्याचा निर्धार!
सध्या भात कापणी आणि मळणीचा हंगाम सुरू होत असल्याने ताडपत्रीची शेतकऱ्यांना मोठी गरज भासत आहे. शेतमालाचे पाऊस आणि इतर नैसर्गिक संकटांपासून संरक्षण व्हावे, या उद्देशाने फाउंडेशनने मदतीचा हात पुढे केला आहे. भविष्यात कोल्हापूर जिल्ह्यातील किमान एक लाख शेतकऱ्यांपर्यंत ताडपत्रीचा लाभ पोहोचविण्याचे उद्दिष्ट निश्चित करण्यात आले आहे.
राजकारणापलीकडे जाऊन समाजकारणाला प्राधान्य!
आजच्या काळात अनेक सामाजिक उपक्रम केवळ प्रसिद्धीपुरते मर्यादित राहतात. मात्र, गरजू व्यक्तींच्या प्रत्यक्ष मदतीसाठी काम करणे आणि त्यांच्या चेहऱ्यावर समाधान निर्माण करणे हेच खरे समाजकार्य असल्याची भूमिका सागर भावके यांनी मांडली आहे. शेतकरी, महिला, युवक, ज्येष्ठ नागरिक तसेच गरजू कुटुंबांच्या समस्या जाणून घेऊन त्यांना शक्य ती मदत करण्याचा फाउंडेशनचा प्रयत्न आहे.
शासनाच्या योजनांचा लाभ शेवटच्या घटकापर्यंत पोहोचविणार!
शासनाच्या अनेक योजना उपलब्ध असतानाही माहितीअभावी ग्रामीण भागातील अनेक पात्र नागरिक या योजनांच्या लाभापासून वंचित राहतात. अशा नागरिकांना योजनांची माहिती देणे, त्यांना योग्य मार्गदर्शन करणे आणि लाभ मिळवून देण्यासाठी सहकार्य करणे, यावरही फाउंडेशन भर देणार आहे.
“शेतकऱ्यांच्या चेहऱ्यावर उमटलेले समाधान, डोळ्यांतील आनंद आणि त्यांच्या ओठांवरील हास्य हेच आमच्या सामाजिक कार्याचे खरे यश आहे. समाजातील शेवटच्या घटकापर्यंत मदतीचा हात पोहोचत नाही, तोपर्यंत आमचे सामाजिक कार्य थांबणार नाही,” अशी भावना सागर भावके यांनी व्यक्त केली.
शेतकऱ्यांच्या हितासाठी राबविण्यात येणारा हा उपक्रम केवळ मदतीचे वितरण नसून सामाजिक बांधिलकी जपण्याचा एक आदर्श प्रयत्न ठरत आहे. राजकारणापलीकडे जाऊन समाजकारणाला प्राधान्य देणाऱ्या या उपक्रमाचे कोल्हापूर जिल्ह्यातून स्वागत होत आहे.
सेवेचा ध्यास... माणुसकीचा विश्वास... आणि समाजाच्या विकासासाठी अखंड प्रवास!
Post a Comment