Top News

हॉटेल ‘अनुयश’मधील वाद ठरला जीवघेणा! ३६ वर्षीय विजय पाटील यांचा मारहाणीत मृत्यू; दोन पोलिस कर्मचाऱ्यांसह तिघांवर खुनाचा गुन्हा!


हॉटेल ‘अनुयश’मधील

 वाद ठरला जीवघेणा!

 ३६ वर्षीय विजय पाटील

 यांचा मारहाणीत मृत्यू;

 दोन पोलिस

 कर्मचाऱ्यांसह तिघांवर

 खुनाचा गुन्हा!

सांगलीवाडी : सांगली शहरातील सांगली-आष्टा मार्गावरील हॉटेल अनुयश येथे झालेल्या वादातून एका ३६ वर्षीय तरुणाचा मृत्यू झाल्याची धक्कादायक घटना समोर आली आहे. विजय वसंत पाटील (वय ३६, रा. अमर चौक, धनगर गल्ली, सांगलीवाडी) असे मृत तरुणाचे नाव आहे. या प्रकरणी नवी मुंबई पोलिस दलातील दोन कर्मचाऱ्यांसह तिघांविरुद्ध सांगली शहर पोलीस ठाण्यात खुनाचा गुन्हा दाखल करण्यात आला आहे. घटनेनंतर संशयित फरार असल्याची माहिती आहे.


जेवणासाठी गेले अन् वादाची ठिणगी पडली

पोलिसांत दाखल फिर्यादीनुसार, ९ नोव्हेंबर रोजी रात्री पावणेबाराच्या सुमारास विजय पाटील हे मित्र विशाल काटकर यांच्यासोबत सांगली-आष्टा रस्त्यावरील हॉटेल अनुयश येथे जेवणासाठी गेले होते. यावेळी हॉटेलचे मालक हरिदास पाटील यांच्यासोबत काही कारणावरून त्यांचा वाद झाला. मध्यरात्रीच्या सुमारास हा वाद पुन्हा उफाळून आला.

वाद मिटवण्यासाठी गेले;

 मात्र मारहाणीचा थरार

विजय यांचे भाऊ विशाल वसंत पाटील हे मित्र प्रकाश भानुसे आणि पवन कोळी यांच्यासह हॉटेलमध्ये पोहोचले. त्यावेळी विजय आणि हॉटेल मालक यांच्यात शाब्दिक चकमक सुरू होती. वाद मिटवण्याचा प्रयत्न सुरू असतानाच हॉटेल मालकाच्या बाजूने आलेल्या सुशील भीमराव सरगर, सुमित भीमराव सरगर आणि एका अनोळखी व्यक्तीने विजय यांना पकडून लाथाबुक्क्यांनी मारहाण केल्याचा आरोप फिर्यादीत करण्यात आला आहे.

भिंतीवर आणि लोखंडी शटरवर आपटल्याचा आरोप

मारहाणीच्या वेळी विजय यांना हॉटेलच्या भिंतीवर तसेच लोखंडी शटरवर जोरात आपटण्यात आल्याचे फिर्यादीत नमूद आहे. या मारहाणीत विजय गंभीर जखमी होऊन बेशुद्ध पडले. मित्र प्रकाश भानुसे यांनी हल्लेखोरांना रोखण्यासाठी हॉटेलमधील पाण्याचा जग त्यांच्या दिशेने फेकल्याची माहिती आहे. मात्र, विजय बेशुद्ध पडल्याचे पाहून संशयित घटनास्थळावरून पसार झाले.

रुग्णालयात दाखल करण्यापूर्वीच मृत्यू

घटनेनंतर प्रकाश भानुसे यांनी १०८ क्रमांकावर संपर्क साधून रुग्णवाहिका बोलावली. विजय यांना सांगलीच्या शासकीय रुग्णालयात दाखल करण्यात आले. मात्र, डॉक्टरांनी तपासणी करून त्यांना उपचारापूर्वीच मृत घोषित केले. या घटनेने सांगलीवाडी परिसरात शोककळा पसरली आहे.

दोन पोलिस कर्मचारी

 असल्याची माहिती

या प्रकरणातील सुशील सरगर आणि सुमित सरगर हे दोघे नवी मुंबई पोलिस दलात कार्यरत असल्याची माहिती वृत्तात देण्यात आली आहे. दोघे जुळे भाऊ असून वाढदिवसाच्या पार्टीसाठी हॉटेलमध्ये आले असताना हा प्रकार घडल्याचे समोर आले आहे.

फॉरेन्सिक पथकाकडून पुरावे संकलित

घटनेची माहिती मिळताच सांगली शहर पोलिसांनी घटनास्थळी धाव घेत पंचनामा केला. फॉरेन्सिक पथकाने घटनास्थळाची पाहणी करून महत्त्वाचे पुरावे संकलित केले आहेत. मृताचे भाऊ विशाल वसंत पाटील यांच्या फिर्यादीवरून सुशील भीमराव सरगर, सुमित भीमराव सरगर आणि एका अनोळखी व्यक्तीविरुद्ध खुनाचा गुन्हा दाखल करण्यात आला आहे.

पोलिस तपासाकडे संपूर्ण जिल्ह्याचे लक्ष

हॉटेलमधील वादातून एका तरुणाचा जीव गेल्याने सांगली शहरात खळबळ उडाली आहे. विशेष म्हणजे, या प्रकरणात पोलिस दलातील कर्मचाऱ्यांची नावे समोर आल्याने तपासाला अधिक महत्त्व प्राप्त झाले आहे. संशयितांचा शोध, घटनेमागील नेमके कारण आणि उपलब्ध सीसीटीव्ही फुटेज याबाबत पोलिस तपासातून पुढील माहिती समोर येण्याची अपेक्षा आहे.


जन प्रतिसाद एक्सप्रेस — सांगली जिल्ह्यातील प्रत्येक महत्त्वाच्या घडामोडीवर निर्भीड आणि वस्तुनिष्ठ वृत्तांकन.

Post a Comment

Previous Post Next Post